مصايفنا في وطنا لاحد يمتحنا

ياهل المنتدى ماشفتوا اللي جرالـي * يوم رحت اتمشى في مصايف وطنّا
ديرةٍ في محبتهـا يطـول المجالـي * والنفوس العزيزه للوطـن يطربنّـا
يوم جيت الجنوب ام الجبال الطوالي * والسحـاب يتزبّـر فوقهـن ويتثنّـا
بهجةٍ للعيون اللي ملتهـا الرمالـي * والكبود الضمايـا عندهـا يرتونّـا
قلت ادوّر على بيتٍ يظـم العيالـي * ونتريّـح بذيـك المنطقـه ونتهنّـا
عقب ذاك الطريق اللي يجي بالهبالي * ضيّقٍ والحـوادث فيـه منّـا ومنّـا
من مشى فيه يومينٍ تجيه الدوالـي * والعظام النشيطه من مسيـره تونّـا
قلت ياراعي المكتب ترا شف بالـي * غرفتينٍ على جو المصايـف تغنّـا
غرفتينٍ هواها من جنوب وشمالـي * واجهتها على السوده جمـالٍ وفنّـا
قال كانك مصيّف دق خشم الريالـي * ولاطلبناك من حمر الـورق لاتضنّـا
مطلبك عندنا والسعر شـيٍ خيالـي * فرصةٍ يالسنافي جت علـى ماتمنّـا
استلم شقتك وارقد من الهم سالـي * واعتبرنا هلٍ لك وانتو اليـوم منّـا
قلت هذي ثمانميه على كـل حالـي * مبلـغٍ راصدينـه للسكـن لاسكنّـا
وانبسطنا ثلاث ايام واربـع ليالـي * في ديارٍ رعَدهـا كـل يـومٍ يحنّـا
ورابع ايامنا من بعد وقت الزوالـي * استلمنا العوايز فالشنـاط وشحنّـا
قلت حنا بنمشي ياكريـم السبالـي * البلـد غاليـه وفلوسنـا ماكفـنّـا
قال وين انت رايح يالزبون المثالـي * تحّسب انّا نسينـا حقنـا تحّسبنّـا
باقي الفين عندك بالوفـا والكمالـي * الحساب المسمّى تونـا لـه فطنّـا
قلـت ياهملالـي ثـم ياهمـلالـي * يمكن انّا غلطنـا فالمحـل يمكننّـا
لانكون اتجهنا للوطـن الاسترالـي * والا ذيك النوايا صوب لنـدن خذنّـا
انت ياللي كليت من الثمر كل حالـي * وكل عامٍ تزايد فـي عنـاك وتجنّـا
قد خذيت السهول وقد خذيت الجبالي * كل شعبٍ ولك فيـه العمايـر تبنّـا
الطمع سد عينك ماتشوف الرجالـي * ولاتقدّر ضروف الناس واللي تعنّـا
خاف ربك ترا حب الوطن راس مالي * والوطن حال من دونه زمـانٍ فتنّـا
ليتنـا ماتعنينـا مـن اول وتالـي * كان ما اخذت دراهمنا ولااحدٍ غبنّـا
ولاطمع في مخابينا الرفيق الموالـي * مانلوم العرب في وضعهـم لاتدنّـا
يالله اني طلبتك ياعظيـم الجلالـي * ياكريم ورزقـك مايجـي فيـه منّـا
رحمتك والعفو يوم الحشر والسؤالي * والرضا يوم تلقانـا ونلقـاك حنّـا
والقناعه برزقٍ من دروب الحلالـي * وابعد الشر والوسواس والهم عنّـا
واحمد الله على الفيه وبِرد الظلالـي * الله اللي بفضله عزنـا فـي وطنّـا

مشكور ياابومازن والله يعطيك العافيه
جهد تشكر عليه
_________________