الواســـــــــــطه اللاقـــــــــطه

مافيـه حاجـه ساقطـه الا وراهـا لاقطـه
واللي يطيح من السما في الارض يلقا له قبيل
والطب ماخلّى عـلاج الا عـلاج الواسطـه
ماعينوا اعلاجهـا فالطـب والطـب البديـل
حتى سهوم اهل النزاهـة فالدوايـر هابطـه
قليل لامنك لقيت اللـي بعـد مخْلـص قليـل
تلقـا خيـوط معاملَتْـك الهينـه مترابـطـه
من دونها يفتل وينقض راعي الطبع الرذيـل
الا يكون تحـط فـي مخبـاه شـيٍ قافطـه
ولا تدوّر واحدٍ قد صـار لـه عنـده جميـل
يمكن تروح وخاطرك مبسوط منـه وباسطـه
انهيت موضوعك وهو قد كان عندك مستحيل
وان جت وظيفة في قطـاعٍ كلبـوه مرابطـه
وظيفـةٍ يالله تسـد الديـن وتفـك الكفيـل
هم جاك من همه وهم ابوه وامـه شاخطـه
لاضاق صدره قال حسبي الله ونعـم الوكيـل
ينقل ملـفٍ حطتـه الاقـلام كنـه خارطـه
من كثر مايكتب عليه ارقـام يشبـه للدليـل
قد له سنينٍ فوق طبلـون الغمـاره صافطـه
مر المناطق كلبوهـا مـن شـروره للجبيـل
قالوا له اللجنه تـرا عنـدك ثنيّـه ساقطـه
والطول تحت المستوى وجسمك ضعيف ونحيل
رح ضبّط امورك مع العالم بـدون مغالطـه
حاول وشف لك حل في عمرك ولايخْدم بخيل
واللـي وراه قصيّـرٍ لكـن حظـه ماغطـه
عيّن له مسنّع وصار بقـدرة القـادر طويـل
عوّد على النادي وسجّل مع صفوف الرابطـه
يشجع الكوره ويلقـا فالعصـر ظـلٍ ظليـل
قال المدرّب ويش ذاك اللي عيونـه شاحطـه
اللي مع الجمهور متجمّد تقـول انـه قتيـل
قالوا هـذاك غليّـمٍ جرحـان قلبـه نافطـه
عليه من بقعا همـومٍ خلّتـه مثـل الهبيـل
قال ازهموه امزح معـه والاطفـه واعابطـه
واشوف لو انه مع الجمهور مدسوسٍ عميـل
نادوَه والماخوذ جا مسـرع وراسـه رابطـه
اسبق من البارود لامن ثار من خشم الفتيـل
قال الولد هذا على رجليـه سرعـه فارطـه
لو نقدر نحطه مهاجـم عندنـا مالـه مثيـل
واقبل عليهم ريّس النـادي وثوبـه زانطـه
يمشي مع الملعب على رجليه كنه مشي فيـل
توه صلاة الظهر قدر الضغط تيـسٍ ماسطـه
والبارحه ممسي وهو في بطنه شقاق الحسيل
قال انت بكره لاتجيني الا وراسـك ماشطـه
وتقص اظافر رجلك اللي كنها روس الدريـل
يمكن نحطك فالهجوم ان كان لعبـك ضابطـه
اربّك تسـد اللـزوم وتبـرد القلـب الغليـل
هذي الجماهيـر الغفيـره كلبوهـا ساخطـه
اللاعبين مهرقلين ومستـوى النـادي هزيـل
قال ابشر بعزّك ونا مانيـب اقـول مهايطـه
والله اني آجمّل عسى الله يكتب الفعل الجميل
ولعبـوا ثـلاث مباريـاتٍ والنقـط متناقطـه
فازوا بها واهدافها من صاحب الجهد المهيـل
مافيه حـارس قدمـه الا بالكبـاري قاشطـه
الين صارت فالصحافه شهرته عابـر سبيـل
وقامت تفاوضه النوادي والعروض مساقطـه
وصارت ملايين الدراهم في حساباتـه تسيـل
واللكزس السودا الجديده عند بابـه صافطـه
والفلّه اللي سلموها له على شاطـي النخيـل
ضحْكت له الدنيا وهو قد بهْذلَتـه الواسطـه
والواسطه في طلبة الله راعي المـد الجزيـل

نشرت بتاريخ 07-06-2008
مع تحيات ابو مازن

مشكور ياابومازن والله يعطيك العافيه
جهد تشكر عليه
_________________